ગંગોત્રી-SARYU PARIKH

મૌનનો ગુંજારવ

લાંબા   સથવારાનો   શાંત   એ   સંવાદ
નીરવ  ના નાદ તોય સૂણું એનો સાદ

મંજુલ   એ   પ્રેમરાગ   કેટલીયે    રાત
રસિલી લય  રચના અનેક વિધ વાત

કોઇ દિન લાગે  અતિબોલ ને  વિવાદ
અબોલાની આડ હાર જીતની ફરિયાદ

તારા  મારા ગુંજનમાં  ભળે નવા સૂર
કલરવ  ને કલબલમાં અટવાતા  સૂર

સંધ્યાની  છાંયડી  ને  મીઠો   મનરવ
તારો  ને  મારો   આ મૌનનો ગુંજારવ

————————

 કૂંપળ

કરમાતી  વાસંતી  વેલ
હાય!  મારી  ધીરજ  ખૂટી
જીવન ને મૃત્યુના ઝોલામાં
 હાશ!  આજ  કૂંપળ  ફૂટી

ઓચિંતા એક દિન દીઠી
ને મરડીને યાદ મીઠી ઉઠી
વાવેલી  બાપુએ જતનથી
ને વીરાએ નીરથી  સીંચેલી

કોમળ  આનંદથી ઝૂલાવી
ફૂલો હૂં વીણતી  ગુલાબી
અદકા આહદથી ગુંથેલી
તરસુ પળ પામવા વિતેલી

કાળજી  કરીને  એને કાપી 
   ભાવેણી  ભગિનીએ  આપી  
  વાવી, વિલસી, પણ શીશીરે સતાવી
મુંજાતી શરમાતી જાય એ સૂકાતી

   પણ આજ,
પ્રીતમના મોંઘેરા વેણ સમી
હાશ!  નવી  કૂંપળ  ફૂટી
————–