પ્રણયના મોતી
Posted in કાવ્યો by saryu on March 28th, 2016 પ્રણયના મોતી
સ્વરોના મોતી સરે પ્રણયમાં
ને હું સૂર બની ને સાંધુ
તુજ સ્મિત રમે રમણમાં
ને હું નૂર બનીને બાંધુ
તું ઝીણો ઝરમર વરસે
ને હું પાન બનીને ઝીલું
તું પવન બનીને લહેરે
ને હું કમળ બનીને ખીલું
તું કિરણ બનીને આવે
ને હું સુરખીમાં રંગાવું
તું ઘટમાં વાદળ ઊમટે
ને હું વીજ બનીને નાચું
તું શ્વાસ બનીને આવે
ને હું ધડકન થઈને જાગું
તું વિશ્વાસ બનીને આવે
ને હું સખી બનીને ચાહું
તું પ્રીત લઈને આવે
ને હું ગુંજન ગાણું ગાવું
મુજમાં તું, ને તુજમાં હું
બસ ઓતપ્રોત થઈ જાવું
——
